"உலகப் போரை காரணம் காட்டி அரசின் தோல்விகளை மறைக்க முடியாது" முஜிபுர் ரஹ்மான் கடும் விமர்சனம்

நாட்டின் தற்போதைய பொருளாதார நெருக்கடிகள் மற்றும் அரசின் பொருளாதார முகாமைத்துவம் தொடர்பில் ஐக்கிய மக்கள் சக்தியின் நாடாளுமன்ற உறுப்பினர் முஜிபுர் ரஹ்மான் கடுமையான விமர்சனங்களை முன்வைத்துள்ளார்.

ஊடகங்களுக்கு கருத்து வெளியிட்ட அவர், நாட்டில் நிலவும் பொருளாதார சூழ்நிலை குறித்து அரசாங்கத்திற்கு தெளிவான புரிதல் உள்ளதா என்ற கேள்வி எழுந்துள்ளதாக தெரிவித்தார். பொருளாதார நெருக்கடிகளை சமாளிப்பதற்கான நடைமுறைசார் திட்டங்கள் இல்லாமல், சர்வதேச நாணய நிதியத்தின் (IMF) திட்டங்களை மட்டுமே நம்பி அரசு செயல்பட்டு வருவதாகவும் அவர் குற்றஞ்சாட்டினார்.

நாட்டின் பொருளாதாரம் தற்போது வளர்ச்சியின்றி தேக்கமடைந்துள்ளதாக சுட்டிக்காட்டிய முஜிபுர் ரஹ்மான், புதிய முதலீடுகள் நாட்டிற்குள் வராத நிலை காணப்படுவதாகவும், புதிய அபிவிருத்தி திட்டங்கள் ஆரம்பிக்கப்படவில்லை என்றும் குறிப்பிட்டார். தனியார் துறையின் முதலீடுகள் குறைந்திருப்பதால் வேலைவாய்ப்பு உருவாக்கமும் பாதிக்கப்பட்டுள்ளதாக அவர் தெரிவித்தார்.

மேலும், பொருளாதார முன்னேற்றம் குறித்து அரசாங்கம் பல்வேறு அறிவிப்புகளை வெளியிட்டாலும், அதன் பயனை பொதுமக்கள் நடைமுறையில் உணரவில்லை என்றும் அவர் கூறினார். மக்களின் வாழ்க்கைச் செலவு, வேலைவாய்ப்பு மற்றும் வருமான நிலைகளில் கணிசமான முன்னேற்றம் எதுவும் ஏற்படவில்லை எனவும் சுட்டிக்காட்டினார்.

நாட்டின் தற்போதைய பொருளாதார சிக்கல்களுக்கு உலகளாவிய போர் மற்றும் சர்வதேச நெருக்கடிகளை அரசாங்கம் காரணமாகக் கூறி வருவதை விமர்சித்த அவர், உலகின் பல நாடுகளும் அதே சவால்களை எதிர்கொண்ட போதிலும், அதனை சமாளிக்க முன்கூட்டியே திட்டமிட்டு நடவடிக்கைகள் எடுத்ததாக குறிப்பிட்டார்.

இந்த உலகளாவிய நெருக்கடி உருவாகும் சாத்தியம் குறித்து அரசாங்கத்திற்கு ஏற்கனவே தகவல்கள் இருந்ததாகவும், கடந்த ஆண்டின் ஆரம்ப மாதங்களிலேயே தேவையான முன்னெச்சரிக்கை நடவடிக்கைகளை எடுக்குமாறு எதிர்க்கட்சி எச்சரித்ததாகவும் அவர் நினைவூட்டினார். ஆனால், அவ்வாறு செயல்படத் தவறியதன் விளைவுகளை இன்று முழு நாட்டினரும் அனுபவித்து வருவதாக அவர் தெரிவித்தார்.

உலகளாவிய காரணிகளை மட்டும் சுட்டிக்காட்டி அரசின் நிர்வாக குறைபாடுகளிலிருந்து தப்பிக்க முடியாது என்றும், நாட்டின் பொருளாதாரத்தை மீட்டெடுப்பதற்கான தெளிவான மற்றும் செயற்பாட்டு திட்டங்களை உடனடியாக நடைமுறைப்படுத்த வேண்டியது அவசியம் என்றும் முஜிபுர் ரஹ்மான் வலியுறுத்தியுள்ளார்.