தங்க அடகு மற்றும் வாகனக் கடன்களில் பாரிய உயர்வு - மத்திய வங்கி தகவல்

இலங்கையில் 2026ஆம் ஆண்டின் முதல் காலாண்டின் இறுதியில் நிதி நிறுவனங்களால் வழங்கப்பட்ட கடன்களின் மொத்த அளவு குறிப்பிடத்தக்க வகையில் அதிகரித்துள்ளதாக இலங்கை மத்திய வங்கி தெரிவித்துள்ளது.

மத்திய வங்கியின் தகவலின்படி, 2026ஆம் ஆண்டின் முதல் காலாண்டின் முடிவில் நிதி நிறுவனங்களின் கடன் வழங்கல் 52.4 சதவீத வளர்ச்சியைப் பதிவு செய்துள்ளது. இந்த வளர்ச்சிக்கு முக்கிய காரணமாக வாகனக் கடன்கள் மற்றும் தங்க அடகு பத்திரங்களுக்கான கடன்கள் காணப்படுவதாக குறிப்பிடப்பட்டுள்ளது.

கடந்த 2025ஆம் ஆண்டின் முதல் காலாண்டின் இறுதியில் நிதி நிறுவனங்களின் கடன் வளர்ச்சி 26.9 சதவீதமாக இருந்த நிலையில், இந்த ஆண்டு அந்த வளர்ச்சி இரட்டிப்பாக உயர்ந்துள்ளது.

குறிப்பாக, வாகன இறக்குமதிகள் மற்றும் வாகனக் கொள்வனவுகள் அதிகரித்துள்ள நிலையில், வாகனங்களுக்காக வழங்கப்பட்ட கடன்களின் அளவு 52.8 சதவீதம் அதிகரித்துள்ளதாக தெரிவிக்கப்பட்டுள்ளது.

அதேவேளை, தங்க அடகு பத்திரங்களை அடிப்படையாகக் கொண்டு வழங்கப்பட்ட கடன்களில் மிகவும் வலுவான வளர்ச்சி பதிவாகியுள்ளது. தங்க அடகு கடன்களின் அளவு 69.2 சதவீதம் அதிகரித்துள்ளதாக மத்திய வங்கி சுட்டிக்காட்டியுள்ளது.

எனினும், எதிர்காலத்தில் நிதி நிறுவனங்களின் கடன் வழங்கல் வளர்ச்சியில் ஓரளவு மந்தநிலை ஏற்படக்கூடும் எனவும் எதிர்பார்க்கப்படுகிறது. வாகன இறக்குமதி வரிகளில் ஏற்பட்டுள்ள அதிகரிப்பு, அந்நிய செலாவணி மாற்று விகிதங்களில் காணப்படும் தாக்கம், வாகன விலைகளின் உயர்வு, இறுக்கமான பணவியல் கொள்கைகள் மற்றும் பொருளாதார முன்னெச்சரிக்கை நடவடிக்கைகள் ஆகியவை கடன் விரிவாக்கத்தின் வேகத்தை குறைக்கக்கூடிய காரணிகளாகக் குறிப்பிடப்பட்டுள்ளன.

இருப்பினும், தற்போதைய நிலவரப்படி தங்க அடகு மற்றும் வாகனக் கடன்களுக்கான தேவை தொடர்ந்து அதிகரித்து வருவதாகவும், அதுவே நிதி நிறுவனங்களின் கடன் வளர்ச்சிக்கு முக்கிய உந்துசக்தியாக அமைந்துள்ளதாகவும் மத்திய வங்கி தெரிவித்துள்ளது.