இரத்தினபுரியில் வீட்டில் மர்மமான முறையில் உயிரிழந்த இளம் பெண்: தீவிர விசாரணையில் பொலிஸார்

இரத்தினபுரி மாவட்டத்தின் கொடிகமுவ பகுதியில் உள்ள வீட்டொன்றில் தனியாக வசித்து வந்த 32 வயதுடைய இளம் பெண் ஒருவர் மர்மமான முறையில் உயிரிழந்த நிலையில் மீட்கப்பட்டுள்ளதாக பொலிஸார் தெரிவித்துள்ளனர்.

உயிரிழந்தவர் கொடிகமுவ பகுதியைச் சேர்ந்த கமகே நிசான்ச சந்தமாலி என அடையாளம் காணப்பட்டுள்ளார். அவர் தனது சொந்த வீட்டில் சந்தேகத்திற்கிடமான சூழ்நிலையில் உயிரிழந்திருந்ததாக ஆரம்பகட்ட விசாரணைகளில் தெரியவந்துள்ளது.

கடந்த 7ஆம் திகதி முதல் வீட்டின் பிரதான நுழைவாயில் திறந்திருந்ததை அவதானித்த அக்கம்பக்கத்தினர் சந்தேகமடைந்து பொலிஸாருக்கு தகவல் வழங்கியுள்ளனர். தகவலின் அடிப்படையில் சம்பவ இடத்திற்குச் சென்ற பொலிஸார் மேற்கொண்ட சோதனையில், படுக்கையறையில் பெண்ணின் சடலம் மீட்கப்பட்டுள்ளது.

சம்பவ இடத்தில் மேற்கொள்ளப்பட்ட ஆரம்பகட்ட ஆய்வுகளில், உயிரிழந்த பெண்ணின் உடை தொடர்பிலும் சந்தேகத்திற்கிடமான சில அம்சங்கள் பதிவாகியுள்ளதாக பொலிஸார் தெரிவித்துள்ளனர். இருப்பினும், மரணத்திற்கான துல்லியமான காரணம் இதுவரை உறுதிப்படுத்தப்படவில்லை.

சம்பவம் தொடர்பாக நீதிமருத்துவ பரிசோதனை மற்றும் மேலதிக விசாரணைகள் முன்னெடுக்கப்பட்டு வருகின்றன. மரணத்தின் உண்மையான காரணத்தையும், அதனுடன் தொடர்புடைய ஏதேனும் குற்றச்செயல் இடம்பெற்றுள்ளதா என்பதையும் கண்டறிவதற்காக பொலிஸார் தீவிர விசாரணைகளை மேற்கொண்டு வருகின்றனர்.