இலங்கையில் கணவனை இழந்த பெண்களின் எண்ணிக்கை அதிகரிப்பு: புதிய புள்ளிவிபரத் தரவுகள் வெளியீடு!

இலங்கையின் தற்போதைய சனத்தொகைப் போக்கின்படி, ஆண்களை விடப் பெண்களே அதிகளவில் தங்களது துணைகளை இழந்தவர்களாக உள்ளனர் எனத் தொகைமதிப்பு மற்றும் புள்ளிவிபரவியல் திணைக்களம் தெரிவித்துள்ளது. தேசிய ரீதியில் 9.4 சதவீத பெண்கள் கணவனை இழந்தவர்களாக இருக்கும் நிலையில், மனைவியை இழந்த ஆண்களின் விகிதம் வெறும் 1.7 சதவீதமாக மட்டுமே பதிவாகியுள்ளது. இந்த பாரிய இடைவெளியானது இலங்கையில் பெண்களின் சமூகப் பாதுகாப்பு மற்றும் வாழ்வாதாரத் தேவைகளை உறுதிப்படுத்த வேண்டியதன் அவசியத்தைச் சுட்டிக்காட்டுகிறது.

இன ரீதியான தரவுகளை ஆராயும்போது, பறங்கியர் சமூகத்தில் மிக உயர்வாக 10.7 சதவீத பெண்கள் கணவனை இழந்தவர்களாக உள்ளனர். இதனைத் தொடர்ந்து இந்தியத் தமிழர் அல்லது மலையகத் தமிழர் சமூகத்தில் 10.5 சதவீத பெண்கள் இப்பட்டியலில் உள்ளனர். சிங்களவர் மற்றும் இலங்கைத் தமிழர் சமூகங்களில் இந்த விகிதம் தலா 9.6 சதவீதமாகச் சம நிலையில் உள்ளது. ஒப்பீட்டளவில், இலங்கைச் சோனகர் (முஸ்லிம்) சமூகத்திலேயே மிகக் குறைந்த அளவாக 7.1 சதவீத பெண்கள் துணையை இழந்தவர்களாகப் பதிவாகியுள்ளனர். அனைத்து சமூகங்களிலும் ஆண்களை விடப் பெண்களே அதிகளவில் தனித்து வாழும் நிலை காணப்படுவதால், இது குறித்த சமூக ரீதியான மேலதிக அவதானிப்புகள் தேவைப்படுகின்றன.