சட்டவிரோத குறியீடு மோசடி: தொலைபேசி எண்கள் அடையாளம் கடும் நடவடிக்கை எச்சரிக்கை

எரிபொருளைப் பெறுவதற்காக சட்டவிரோதமாக QR குறியீடுகளை உருவாக்கிய 153 கையடக்க தொலைபேசி எண்கள் அடையாளம் காணப்பட்டுள்ளதாக அமைச்சர் Nalinda Jayatissa தெரிவித்துள்ளார்.

இந்த விவகாரம் தொடர்பான தகவல்கள் பொலிஸாருக்கும் குற்றப் புலனாய்வுத் துறைக்கும் அனுப்பப்பட்டுள்ளதாகவும், சம்பந்தப்பட்டவர்களுக்கு எதிராக சட்ட நடவடிக்கை எடுக்கப்படும் என்றும் அவர் குறிப்பிட்டார்.

அரசாங்க தகவல் திணைக்களத்தில் நடைபெற்ற ஊடக சந்திப்பில் அவர் மேலும் தெரிவித்ததாவது, QR முறைமையை தவறாக பயன்படுத்தி எரிபொருள் பெற முயற்சிகள் இடம்பெற்று வருகின்றன. இதனுடன் தொடர்புடையதாக, 79 இடங்களில் சட்டவிரோதமாக எரிபொருள் பதுக்கி வைத்திருந்த நபர்களும் கைது செய்யப்பட்டுள்ளனர்.

சாதாரண மக்களின் அன்றாட வாழ்க்கையைத் தொடர உதவும் எரிபொருளை தீய நோக்கத்துடன் பதுக்குவது சமூகத்துக்கு பாதிப்பை ஏற்படுத்தும் என அமைச்சர் எச்சரித்தார்.

மேலும், இத்தகைய சட்டவிரோத நடவடிக்கைகளில் ஈடுபடுவதால் எந்த நன்மையும் இல்லை என்றும், தொடர்புடைய அனைவர்மீதும் சட்டம் கடுமையாக அமல்படுத்தப்படும் என்றும் அவர் வலியுறுத்தினார்.

இத்தகைய மோசடிகளுக்கு ஆதரவாக செயல்படாதீர்கள் என்றும், சந்தேகத்திற்கிடமான நடவடிக்கைகள் குறித்து உடனடியாக பொலிஸாருக்கு தகவல் வழங்குமாறும் பொதுமக்களிடம் அவர் கோரிக்கை விடுத்துள்ளார்.